ജീവിതം എന്ന ലേബല്‍ ഉള്ള പോസ്റ്റുകള്‍ കാണിക്കുന്നു. എല്ലാ പോസ്റ്റുകളും കാണിക്കൂ
ജീവിതം എന്ന ലേബല്‍ ഉള്ള പോസ്റ്റുകള്‍ കാണിക്കുന്നു. എല്ലാ പോസ്റ്റുകളും കാണിക്കൂ

2018 ഒക്‌ടോബർ 12, വെള്ളിയാഴ്‌ച

# Me too

ചാരിത്ര്യം എന്നത് 'അവളുമാർ' തങ്ങൾക്കായി താങ്ങിക്കൊണ്ടു നടക്കേണ്ടുന്ന എന്തോ ആണെന്നും, അത് തങ്ങൾക്കനുഭവിക്കാൻ വേണ്ടിയുള്ളതാണെന്നും, അവളുടെ മേൽ സമ്പൂർണ്ണാധിപത്യം സ്ഥാപിക്കാനുള്ള ഏറ്റവും ലളിതമായ മാർഗ്ഗം അവളെ ശാരീരികമായി കീഴ്പ്പെടുത്തുകയാണെന്നും ധരിച്ചവശരായ, കന്യാചർമ്മം സദാചാരക്കോലായി കൊണ്ടുനടക്കുന്ന, സമൂഹത്തിലെ ഉന്നതരായ വിഡ്ഢികൾക്കെതിരെ നടക്കുന്ന ചരിത്രത്തിലിടം നേടിയ ശക്തമായ മുന്നേറ്റമാണ് # Me too campaign. അതിനെ താറടിക്കുന്ന ഏത് സന്ദേശത്തെയും കുപ്പയിലെറിയണം.

ഇതും കൂടി,

'ഒരു പണി അങ്ങേർക്കും ഇരിക്കട്ടെ'യെന്നു വച്ച് ചിലരെ നോക്കി ബർതേ അങ്ങനെ # Me too എന്ന് പറയുന്നവരുണ്ടെങ്കിൽ ഒരു കണ്ണ് വേണം.

എതിർ പാർട്ടിക്കാർ വീടിനു മുന്നിൽ വന്ന് പുലഭ്യം പറഞ്ഞ കാര്യം പരാതിപ്പെടാൻ സ്റ്റേഷനിലെത്തിയ യുവരക്തത്തോട് പോലീസേമാൻ പറഞ്ഞതെന്തെന്നോ, ഈ സാക്ഷര കേരളത്തിൽ? 'തന്റെ ഭാര്യയെ അവർ അധിക്ഷേപിച്ചു എന്നും കൂട്ടിയെഴുതി വച്ചോ, കേസിന് നല്ല ബലം കിട്ടും' എന്ന്! ഇങ്ങനെയൊക്കെക്കൂടിയാണിവിടം.

ജൻഡർ, ലൈംഗികത, പരസ്പരബഹുമാനം, സമത്വം തുടങ്ങിയ സാമൂഹ്യപാഠങ്ങൾ നമ്മില്‍ നിന്നും ഇനിയും അകലെയാണ്, കൈ നന്നായി നീട്ടണം, ഒന്ന് തൊടാന്‍.

മോഹൻ റായും വിവേകാനന്ദനും അംബേദ്കറും നാരായണനും അയ്യങ്കാളിയും കേളപ്പനുമൊക്കെ കൊണ്ടുവിട്ടിടത്തു നിന്നും പിന്നോട്ടു നടക്കുന്ന ആൾക്കൂട്ടത്തിൽ, ചിന്താശേഷി കൈമോശം വന്നിട്ടില്ലാത്ത ഒരു തലമുറ എവിടെയൊക്കെയോ ഉണ്ട് എന്ന ധാരണ കൊണ്ടു മാത്രം ഇത്രയും സമയവും ഊർജ്ജവും ഇവിടെ ഒഴുക്കുന്നു.

2018 ഒക്‌ടോബർ 10, ബുധനാഴ്‌ച

നിങ്ങ ശരിക്കും ആരാണ്?

"നീ അമ്പലക്കാരാണോ പള്ളിക്കാരാണോ?"

ചോദ്യം പാച്ചുവിനോട് അവന്റെ ഒരു കൂട്ടുകാരന്റെ വക.

"ഞാൻ ആരുംകാരല്ല", പാച്ചുവിന്റെ മറുപടി. 

പാച്ചുവിന് വയസ്സ് അഞ്ചര.

2018 ഒക്‌ടോബർ 1, തിങ്കളാഴ്‌ച

അമ്മ തീണ്ടാതിടങ്ങള്‍

"ഇതുവരെ അമ്പലത്തിൽ  കയറണമെങ്കിൽ കുളിക്കണമായിരുന്നു.  ഇനിമുതൽ അമ്പലത്തിൽ പോയാൽ വീട്ടിൽ കയറണമെങ്കിൽ കുളിക്കണം"

വാസപ്പിൽ നിന്നും കിട്ടീതാണ്. വരികളുടെ ഉദ്ദേശ്യം ശബരിമലയിൽ സ്ത്രീകൾ കൂട്ടിത്തൊട്ടശുദ്ധമാക്കുന്ന കാര്യം തന്നെ. സുപ്രീം കോടതി വിധിയിൽ ഹതാശരായ ഭക്തക്കൂട്ടത്തിലാരോ പടച്ച ഈ പുളിച്ച തമാശ ഇകഴ്ത്തുന്നത് ഞങ്ങൾ പുരുഷന്മാരിൽ ചിലരെങ്കിലും ബഹുമാനിക്കുന്ന സ്ത്രീത്വത്തെയാണ്, മാതൃത്വത്തെയാണ്, പച്ചക്ക് പറഞ്ഞാൽ ആർത്തവ രക്തത്തെയാണ്. പുരുഷന്മാരാൽ വിരചിതമായതെന്ന് ഊഹിക്കാവുന്ന ഈ തമാശ ഷെയർ ചെയ്യപ്പെടുന്നത് സ്ത്രീകളിലൂടെത്തന്നെയെന്ന അവസ്ഥ പരമദയനീയം തന്നെ.  



ചിലതോര്‍ത്തു പോകുന്നു......
 

തറവാട്‌ നാലുകെട്ടായിരുന്നു. വിശാലമായ നടുമുറ്റം. സമചതുരത്തില്‍ കരിങ്കല്ലു പാകിയ തിണ്ണ ചുറ്റും, അതിനും മേലെ തടി കൊണ്ടുള്ള പടിയും അട്ടം താങ്ങുന്ന പത്തിലധികം തൂണുകളും. നടുമുറ്റത്തിനു തെക്കുവശത്ത് അല്‍പം ഉയര്‍ന്ന് തെക്കിനി. അതിനു കിഴക്കായി ഒരു ചായ്പ്‌. പടിഞ്ഞാറു വശത്ത് അറയും അതിനുള്ളില്‍ ഒന്നര ആള്‍ പൊക്കത്തില്‍ പത്തായങ്ങളും. അറക്ക് പിന്നിലുമൊരു ചായ്പ്. വടക്ക് പടിഞ്ഞാറു വശത്ത് ഒരു കിടപ്പുമുറിയും വടക്ക്‌ കിഴക്ക് വശത്ത് ഒരു ഉരല്‍ മുറിയും, രണ്ടിനും നടുക്ക് മുത്തശ്ശി കിടക്കുന്ന വടക്കിനിയും. ഉരലു മുറിക്കപ്പുറം വടക്ക്  കിഴക്കേ കോണിലായി തീന്മുറിയും അതിനും കീഴെ അടുക്കളയും. പിന്നെയും തെക്കോട്ടു നീങ്ങിയാല്‍ ഒരു ചെറിയ മുറിയും അടുത്ത് കെഴുക്കിനിയും, തൊട്ടടുത്ത് പരദേവതയുടെ ശ്രീകോവിലും. അത് തെക്കിനിക്കടുത്തുള്ള ചായ്പുമായി ഭിത്തി പങ്കിടുന്നു. ഇതിനു നേരെയാണ് പടിഞ്ഞാറ് വശത്തേക്ക് തുറക്കുന്ന വാതില്‍. പൂജാമുറിയുടെ മുന്നിലൂടെയല്ലാതെ ഈ വാതിലിലൂടെ കടക്കാന്‍ പറ്റില്ല. ഈ വാതില്‍ ഒരു ഹൈലൈറ്റ്‌ ആണ്, തുറക്കുമ്പോളും അടക്കുമ്പോളും വലിയ ശബ്ദം കേള്‍ക്കും, തെക്കോട്ടു തുറക്കുന്ന പൂമുഖവാതിലിനെക്കാളും ഉപയോഗം ഇതിനായിരുന്നു. ഇപ്പോള്‍ നടുമുറ്റത്തിന് നമ്മള്‍ ഒരു ചുറ്റു വച്ചു. മുറികള്‍ക്കെല്ലാം പുറത്ത്‌ വീതിയിലുള്ള വരാന്തയുമുണ്ട്. നടുമുറ്റത്തിന് ചുറ്റും ഇപ്പറഞ്ഞ മുറികളിലെല്ലാമായി മുത്തശ്ശിയും 'അച്ഛനും അനിയന്മാരും തങ്ങളുടെ കുഞ്ഞുകുടുംബങ്ങളുമായി' അങ്ങനെയങ്ങനെ ജീവിച്ചു പോകുന്നു, ഒരു മൂലക്ക് കുടുംബപരദേവതയും.



എല്ലാ മാസത്തിലും ഒരു ദിവസം അമ്മ  ‘പൊറത്തായി’ എന്നറിയിപ്പ് കിട്ടും. അമ്മയെ ചുറ്റി കറങ്ങുന്ന അടുക്കള അതോടെ നാല് ദിവസത്തേക്ക് മുത്തശ്ശിയുടെയോ ചെറിയമ്മമാരുടെയോ ഭരണത്തിലാവും. ‘പൊറത്താവുന്ന’ അല്ലെങ്കില്‍ ‘തീണ്ടാരി’യാവുന്ന സ്ത്രീകള്‍ ഒന്നും എങ്ങും  തൊട്ടുതീണ്ടിക്കൂടാ, നടുമിറ്റത്തേക്കോ മറ്റു പ്രധാന മുറികളിലേക്കോ അടുക്കളയിലേക്കോ കേറിക്കൂടാ, ആഹാരം പുറംപണിക്കാര്‍ക്ക് കൊടുക്കുന്ന പോലെ വരാന്തയില്‍ നിലത്തിരുത്തി ‘എറിഞ്ഞു’ കൊടുക്കും. രാത്രിയാകട്ടെ, കിടപ്പുമുറിയില്‍ താഴെ ഒരു മൂലക്ക് പായ വിരിച്ചുള്ള കിടപ്പും. ഇതെന്ത് സംഭവമാണെന്ന് മനസ്സിലാക്കാന്‍ ശ്രമിക്കുന്നതിനെക്കാളേറെ കൗതുകം മാസത്തില്‍ ഒരു ദിവസം കൃത്യമായി എങ്ങനെ ‘ഇത്’ വരുന്നുവെന്നതും അമ്മ 'ഇതെ'ങ്ങനെ മനസ്സിലാക്കുന്നു എന്നുള്ളതുമായിരുന്നു. 



ശ്രീകോവിലിനു നേരെ മുന്നില്‍, തുറക്കുമ്പോളും അടക്കുമ്പോളും വലിയ ശബ്ദം കേള്‍ക്കുന്ന പടിഞ്ഞാറ് വശത്തേക്കുള്ള വാതിലിനെപ്പറ്റി പറഞ്ഞതോര്‍മ്മയില്ലേ? അമ്മ പറയാറുള്ള ഒരു സംഭവമുണ്ട്, ഇതിനെപ്പറ്റി. അടുത്തുള്ള എവിടെയോ ഒരു കല്യാണമോ മറ്റോ നടക്കുന്ന ഒരു ദിവസത്തലേന്ന് രാത്രി എല്ലാവരും പോയി. പുറത്തായിരുന്ന അമ്മ മാത്രം വടക്ക് പടിഞ്ഞാറു വശത്ത് കിടപ്പുമുറിയുടെ മൂലക്ക് പായ വിരിച്ചു കിടക്കുന്നു. നേരത്തെ വരാമെന്നു പറഞ്ഞു പോയവരെ ഒന്നും കാണുന്നില്ല. പുറത്തേക്കുള്ള വാതിലുകള്‍ എല്ലാം അടച്ചിട്ടുണ്ടോ എന്നറിയാതെ, ഹൈലൈറ്റ്‌ വാതിലിന്‍റെ ശബ്ദം വരുന്നുണ്ടോ എന്ന് ചെവി കൂര്‍പ്പിച്ച്, പേടിച്ച് ഒരു രാത്രി മുഴുവന്‍ കഴിച്ചു കൂട്ടേണ്ടി വന്നത്രെ അമ്മക്ക്. സംഗതി എത്ര ഗൌരവമുള്ളതാണെങ്കിലും, തീണ്ടാതിടങ്ങള്‍ തീണ്ടിക്കൂടാ. വേറെ ആരും കാണുന്നില്ലെങ്കിലും പരദേവതയെ കളിപ്പിക്കാന്‍ പറ്റുമോ?




പിന്നീട് ജീവശാസ്ത്ര വിദ്യാര്‍ഥിയായപ്പോഴാണ് ‘പൊറത്താവുന്ന’തെന്തു സംഭവമാണെന്ന് മനസ്സിലാക്കുന്നത്. അന്ന് ഇത്തരം ആചാരങ്ങളെ വിശകലനം നടത്താനുള്ള ശ്രമം തുടങ്ങി. തീണ്ടാരിപ്പെണ്ണിനെ കിടപ്പുമുറിയില്‍ നിന്നും അടുക്കളയില്‍ നിന്നും പണ്ടുള്ളവര്‍ അകറ്റി നിര്‍ത്താൻ തുടങ്ങിയത് അവള്‍ക്ക് മാസത്തില്‍ നാല് ദിവസത്തേക്കെങ്കിലും പൂര്‍ണവിശ്രമം കൊടുക്കാനായിരുന്നിരിക്കുമോ? എപ്പോഴാണത് അശുദ്ധിയും നിഷിധവുമായിത്തീർന്നിട്ടുണ്ടാവുക?




വീട്ടുപണിയില്‍ നിന്നും ശ്രദ്ധ തിരിക്കാന്‍ പറ്റാതെ അമ്മ വേവുന്നത് കണ്ട് അകമേ വെന്ത ഞാന്‍ ആ നാലു ദിവസമെങ്കിലും സമാധാനം കണ്ടെത്താന്‍ ശ്രമിച്ചു, പക്ഷെ അമ്മ അവിടെയും എന്നെ തോല്‍പിച്ചു കളഞ്ഞു. കിടപ്പുമുറിയില്‍, താഴെ ഒരു മൂലക്ക് വിരിക്കാറുള്ള പായയില്‍ നിന്നും എഴുന്നേറ്റ് അമ്മ നേരെ മുറ്റത്ത്‌ വിറക്‌ കീറുവാനും പറമ്പിലെ മറ്റു പണിക്കും പോകും. കൂടാതെ ആഹാരം പുറംപണിക്കാര്‍ക്ക് കൊടുക്കുന്ന പോലെ വരാന്തയില്‍ നിലത്തിരുത്തിയും, അത്രക്ക് വെറുക്കപ്പെട്ടവളാണ് തീണ്ടാരിപ്പണ്ടാരം. ചുരുക്കത്തില്‍ മാസത്തില്‍ നാല് ദിവസം വിശ്രമം വേണ്ടവൾക്ക് കിട്ടുന്നത് ഇരട്ടിപ്പണിയും എറിഞ്ഞു കൊടുക്കുന്ന ഭക്ഷണവും മുറിയുടെ മൂലക്ക് പായില്‍ ചുരുണ്ട് കിടത്തവും! ഫെമിനിസ്റ്റ്‌ ലൈനില്‍ ഇതൊന്നും ഇപ്പോള്‍ വിശകലനം ചെയ്യാന്‍ ഇറങ്ങിപ്പുറപ്പെടുന്നില്ല, ഇതെല്ലാം അന്നത്തെ കുഞ്ഞുമനസ്സിനെ നോവിച്ച കൊച്ചു കൊച്ചു നൊമ്പരങ്ങള്‍ മാത്രം.



ഇപ്പോള്‍ സംഭവങ്ങള്‍ മാറിയിട്ടുണ്ട്, ‘പൊറത്താവുന്നതിന്‍റെ ജൈവശാസ്ത്ര നീതി എല്ലാവരും മനസ്സിലാക്കിത്തുടങ്ങിയിരിക്കുന്നു. ജൈവചക്രത്തിന്‍റെ ഒരു ഭാഗം എന്ന നിലയില്‍ അതിനെ അംഗീകരിച്ചും കഴിഞ്ഞിരിക്കുന്നു, നല്ലത് തന്നെ.        


2018 ഓഗസ്റ്റ് 13, തിങ്കളാഴ്‌ച

2018 ഓഗസ്റ്റ് 9, വ്യാഴാഴ്‌ച

അച്ഛന്മാര്‍ കളമൊഴിയുമ്പോള്‍ ഒന്നാം സ്ഥാനത്ത് വരുന്ന അമ്മമാര്‍



എല്ലാ വീടുകളിലും നെയിംബോര്‍ഡ് വക്കണമെന്ന് റെസിഡന്‍സ് അസോസിയേഷന്‍ മീറ്റിംഗില്‍ തീരുമാനമായി. അപ്പോള്‍ത്തന്നെ സംശയം ഉന്നയിച്ചു, ‘വീട്ടുപേരിനൊപ്പം ആരുടെ പേരായിരിക്കും?’ എന്ന്. ഉത്തരം ഉടന്‍ കിട്ടി, 'ഗൃഹനാഥന്‍റെ' തന്നെയെന്ന്. റേഷന്‍ കാര്‍ഡ്‌ ആരുടെ പേരിലാണെന്നും, അതെങ്ങനെ അങ്ങനെയായി എന്നതിന് കുറച്ച് സാമൂഹ്യശാസ്ത്രപരമായ ചരിത്രമുണ്ടെന്നും ചെറുതായി വിശദീകരിക്കേണ്ടി വന്നു. വീടുകളില്‍ 'വീട്ടമ്മമാര്‍' ചെയ്യുന്ന ശമ്പളമില്ലാത്ത, ‘കാണാപ്പണി’കളെക്കുറിച്ചും സൂചിപ്പിച്ചു (invisible domestic works ആണേ കവി ഉദ്ദേശിച്ചത്, ഇനി അതിന്മേല്‍ പൊങ്കാല വേണ്ട). Gender എന്നും Equality എന്നൊന്നും പറഞ്ഞു ബോറടിപ്പിക്കാന്‍ പോയില്ല. കുറച്ച് സമയം പോയത് മെച്ചം!  

എന്തായാലും മൂന്നു മാസങ്ങള്‍ക്ക് ശേഷം അസോസിയേഷന്‍ ഭാരവാഹികള്‍ നെയിംബോര്‍ഡ് എത്തിച്ച്, ഭിത്തിയില്‍ തൂക്കി. ഗൃഹനാഥനായ അച്ഛന്‍റെ  പേരും, വീട്ടുപേരും, വീട്ടുനമ്പരും, അസോസിയേഷന്‍റെ പേരും, ലോഗോയും  മാത്രം!
മീറ്റിംഗില്‍ ഉന്നയിച്ച വിഷയം പൊക!
(ഗൃഹനാഥന്‍ മരണപ്പെട്ട വീട്ടിലെ നെയിംബോര്‍ഡില്‍ എന്തായാലും ഗൃഹനാഥയുടെ പേരുണ്ടാവും, തീര്‍ച്ച! റേഷന്‍ കാര്‍ഡ് ഗൃഹനാഥയുടെ പേരിലാക്കിയതിന്‍റെ ഗുട്ടന്‍സ് ആര്‍ക്കും തിരിഞ്ഞിക്കില്ല താനും).  


‘അമ്മയുടെ പേരെന്തു കൊണ്ട് ബോര്‍ഡിലില്ല?’ എന്ന സംശയം വീട്ടില്‍ ഉറക്കെ ഉന്നയിച്ചു. ‘എന്നാല്‍പ്പിന്നെ എല്ലാരുടേയും പേരുകള്‍ ആകാമായിരുന്നു’ എന്നു തുടങ്ങിയ ചര്‍ച്ചകള്‍ മാത്രം! അമ്മയുടെ പേര് കൂടി ചേര്‍ക്കാന്‍ പോവുകയാണെന്ന് പറഞ്ഞു. ‘എനിക്ക് തീരെ താല്‍പ്പര്യമില്ല’ എന്ന് അമ്മ വിനീതവിധേയയായി. എന്ത് വേണമെങ്കിലും ചെയ്തോളാന്‍ അച്ഛനും.  

വീട്ടില്‍ തൂക്കിയ ബോര്‍ഡും പൊക്കി, ടൌണില്‍ നെയിംബോര്‍ഡ് തയ്യാറാക്കിയ കട കണ്ടെത്തി, മാറ്റര്‍ തിരുത്തി പുതിയ പ്രിന്‍റുമെടുത്ത് പോന്നു.
ഇപ്പോള്‍ അതില്‍ അച്ഛന്‍റെയും അമ്മയുടെയും പേരുകള്‍ ഉണ്ട്.  
എനിക്കൊരു മനസ്സുഖം, അദ്ദന്നെ!

എന്നും രണ്ടാം സ്ഥാനത്ത് നില്‍ക്കുകയും അച്ഛന്‍ മരിച്ചു കളമൊഴിയുമ്പോള്‍ മാത്രം ഒന്നാം സ്ഥാനത്ത് വരികയും ചെയ്യേണ്ടുന്ന ഒരാളല്ല അമ്മ. അവരിലൊരാള്‍ താഴേയും മറ്റൊരാള്‍ മുകളിലുമല്ല. 



ആരോട് പറയേണ്ടൂ? പറഞ്ഞിട്ടെന്തു കാര്യം?
മീശക്കാര്യത്തില്‍ എസ്. ഹരീഷ് പറഞ്ഞപോലെ, ‘സമൂഹം പാകപ്പെടുന്ന', പരുവപ്പെടുന്ന, പക്വപ്പെടുന്ന അവസ്ഥയിങ്കല്‍ ഈ വാക്കുകള്‍ തിരിച്ചറിയപ്പെട്ടേക്കാം. ഇല്ലെങ്കിലും ഒരു പുല്ലുമില്ല.    

2018 ജൂലൈ 17, ചൊവ്വാഴ്ച

കര്‍ക്കിടകം വീണ്ടും


ഇന്നെല്ലാവര്‍ക്കും വേണ്ടതിലധികം 'രാമായണമാസാരംഭം ആശംസകള്‍' കിട്ടിക്കാണുമല്ലോ.
പഞ്ഞ മാസമായ കര്‍ക്കിടകത്തില്‍ ഇടമുറിയാതെ പെയ്യുന്ന മഴയില്‍ പുറത്തിറങ്ങാനാവാതെ വിശപ്പ്‌ കൊണ്ട് ഗതി കെട്ടങ്ങനെ കുത്തിരിയ്ക്കെ, പണ്ടേതോ മുത്തച്ഛനോ മുത്തശ്ശിയോ തുടങ്ങി വച്ച ഒരേര്‍പ്പാടാകാം ഈ രാമായണം വായന. അല്ലാതെ കര്‍ക്കിടക മാസത്തിന് രാമായണവുമായി വല്ല ബന്ധവുമുണ്ടെന്ന് കരുതാന്‍ തരമില്ല.
കര്‍ക്കിടകത്തില്‍ മാത്രമല്ല, ഏതു സമയത്തും രാമായണശീലുകള്‍ ഈണത്തില്‍ ചൊല്ലിയാല്‍ ഈണം ഉറയ്ക്കും, താളത്തില്‍ ചൊല്ലിയാല്‍ താളവും. ഇനി ഉച്ചാരണശുദ്ധിയാണ്‌ ലക്ഷ്യമെങ്കില്‍ അക്ഷരസ്ഫുടതയോടെ ചൊല്ലാം. പക്ഷെ ഇതിനൊക്കെ രാമായണം തന്നെ വേണമെന്നില്ല കേട്ടോ, ആശാന്‍റെയോ വള്ളത്തോളിന്റെയോ ഓ എന്‍ വി യുടെയോ കവിതകള്‍ മതി. അതല്ലെങ്കില്‍ ബഷീറിന്റെയോ എം ടി യുടെയോ കഥകള്‍ ആയാലും മതി. കഥകള്‍ എന്നും കഥകള്‍ തന്നെ, കാവ്യങ്ങള്‍ അങ്ങനെയും.

2018 ജൂലൈ 5, വ്യാഴാഴ്‌ച

Regularly and Occasionally


സ്ഥിരമായി (regularly) മാലിന്യങ്ങളും; വല്ലപ്പോഴുമൊക്കെ (occasionally) കുട്ടികളുമല്ലാതെ എന്തെങ്കിലും ഉല്‍പ്പാദിപ്പിക്കാന്‍ പറ്റുമോ എന്ന ചിന്തയിലും പ്രയത്നത്തിലുമാണ്. പാലക്കാട് ഒരിടത്ത് കുറച്ച് നെല്‍കൃഷി ചെയ്യുന്ന തിരക്കിലാണ്. രണ്ടരയേക്കറില്‍ ജ്യോതി മട്ടയും ASD വെള്ളയും നട്ടിട്ടുണ്ട്  ഇപ്പോള്‍. 'ചെലവില്ലാ പ്രകൃതി കൃഷി' literally അങ്ങനെ തന്നെ ആണോ? എന്ന പരീക്ഷണത്തിലുമാണ്. കുറേക്കാലമായി ആലോചിക്കുന്ന കാര്യമാണ്. ഇന്ധനവും ചെല്ലും ചെലവും തന്ന് ഊട്ടി വളര്‍ത്തിയതാവട്ടെ, എം. എസ്. സ്വാമിനാഥന്‍ ഗവേഷണ നിലയവും. ഗിരീശനും അരുണും കൂടെയുണ്ട്. കൃഷ്ണന്‍കുട്ടി, പപ്പന്‍, ജേപീ തുടങ്ങി കുറേപ്പേര്‍ സഹായത്തിനും.


കര്‍ഷകനാണ്, വരട്ടെ, കണ്ടറിയണം, കൊണ്ടും!

2018 ഫെബ്രുവരി 26, തിങ്കളാഴ്‌ച

സെല്‍ഫി

വളഞ്ഞ് പിടിച്ച്, കെട്ടിയിട്ട്, സെല്‍ഫിയെടുത്ത്, തല്ലിക്കൊന്നു കളഞ്ഞല്ലോഡോ.
പണ്ടേ കണ്ടു കഴിഞ്ഞൂ. 

വിശന്നു വലഞ്ഞു മോഷ്ടിച്ചു പെട്ടുപോയതല്ലെങ്കിലും അട്ടപ്പാടി വികസനം വീണ്ടും ചര്‍ച്ചയാകുന്നു. ഐ. ടി. ഡി. പി. അവിടേയ്ക്ക് പുതിയ മേധാവിയെ തേടുന്നു! കിര്‍ത്താഡ്‌സും ജനശ്രദ്ധയിലേക്ക്. മുഖ്യമന്ത്രി വരുന്നു, ഭക്ഷ്യധാന്യ വിതരണം, തൊഴിലുറപ്പ്, ഭൂമി വാഗ്ദാനം, സ്ഥിരം ചടങ്ങുകള്‍, പൊടിപൂരം തന്നെ.

എന്ന പോസ്റ്റിന്‍റെ പ്രസക്തി നഷ്ടമാവുന്നില്ല.  ചിലത് പ്രവര്‍ത്തനക്ഷമമാകുവാന്‍ രക്തസാക്ഷികള്‍ കൂടിയേ തീരൂ. 

2018 ഫെബ്രുവരി 13, ചൊവ്വാഴ്ച

ശാന്തിക്കാരന്‍



ഒരു ദിവസം 

അമ്മ: തൃശ്ശൂര്ന്നും അവര് വിളിച്ചാല്‍ താല്പര്യമില്ലാന്നന്നെ പറഞ്ഞോളൂ ട്ടോ. ശാന്തിക്കാരന്റെ കൂടെ കാലം കഴിക്കാനാര്‍ന്നെങ്കി അവളെ എമ്മെസ്സി വരെ വിടണ്ടായിരുന്നല്ലോ?

അച്ഛന്‍: കൊല്ലത്തെ ആ ഇന്‍ഫോസിസ് പയ്യന്‍റെ ജാതകം കഷ്ട്ടി പിഷ്ട്ടി ഒപ്പിക്കാന്നാ വാര്യര് പറേന്നെ. അവരെ ഒന്നങ്ങ്ട് വിളിച്ച് നോക്കാം. 

അമ്മാവന്‍: 😐


2017 മേയ് 14, ഞായറാഴ്‌ച

എല്ലാം ശരിയാവുമായിരിക്കുമല്ലേ?

"പഠിക്കാന്‍ ആഗ്രഹം ഉണ്ടെങ്കിലും അതിനു വേണ്ട യാതൊന്നും ഇല്ലാത്തവരാണ് ഇവിടുത്തെ വിദ്യാര്‍ഥികള്‍. ................. പദ്ധതിയിലൂടെ അവര്‍ക്കും ഇപ്പോള്‍ നന്നായി പഠിക്കാന്‍ കഴിയുന്നു. നല്ലൊരു ഭാവി സ്വപ്നം കാണാന്‍ കഴിയുന്നു. പറഞ്ഞറിയിക്കാനാകാത്ത സന്തോഷമുണ്ട്. ഈ വര്‍ഷവും അവര്‍ക്കു വേണ്ട സഹായങ്ങള്‍ ലഭിക്കുമെന്ന് പ്രതീക്ഷിക്കുന്നു."

മാതൃഭൂമി ദിനപ്പത്രം അതിന്‍റെ ഒരു വിദ്യാഭ്യാസ  പദ്ധതിയുടെ പരസ്യം കൊടുത്തപ്പോള്‍, അതിലൂടെ തന്‍റെ വിദ്യാര്‍ഥികളുടെ  അവസ്ഥ വിവരിച്ചിരിക്കുന്നു, ഒരു സര്‍ക്കാര്‍ എല്‍. പി. സ്കൂള്‍ ഹെഡ്മിസ്‌ട്രസ്!


"ഇവിടെ യാതൊന്നും ഇല്ലാ, ഇല്ലാ" എന്ന്‍ സര്‍ക്കാരിനോട് പറഞ്ഞു മടുത്തിട്ടായിരിക്കുമല്ലെ അവസാനം ദിനപ്പത്രം കനിഞ്ഞപ്പോള്‍ ഇത്ര സന്തോഷിക്കുന്നത്?

ഇത് വായിക്കുന്ന, കുറച്ചെങ്കിലും സാമ്പത്തിക ശേഷിയുള്ള ആരെങ്കിലും തന്‍റെ മക്കളെ  സര്‍ക്കാര്‍ സ്കൂളില്‍ വിടുമോ?


(ഒരുപക്ഷെ, പരസ്യമായത് കൊണ്ട് പത്രക്കാര്‍ തന്നെ കുറച്ച് ഓവറാക്കിയതായിരിക്കുമോ?) 


പൊതുവിദ്യാഭ്യാസരംഗം മെച്ചപ്പെടുത്താന്‍ പുറത്തു നിന്നും സംഭാവന വാങ്ങുന്നത് ശരിയെങ്കില്‍ അത് സര്‍ക്കാര്‍ മുന്‍കൈയെടുത്ത് ചെയ്യുന്നതല്ലേ ഉചിതം? ഓരോരോ സ്കൂളുകളുടെ പേരില്‍ എന്തിന് പരസ്യങ്ങള്‍ വരണം?

എനിക്ക് വളരെയധികം പ്രതീക്ഷയുണ്ട്, നവകേരള മിഷന്‍റെ പൊതുവിദ്യാഭ്യാസ സംരക്ഷണ യജ്ഞത്തില്‍; പിന്നെയുള്ളതോ? 2018-ല്‍ ആമ്പല്ലൂര്‍ ഗവണ്മെന്‍റ് ജൂനിയര്‍ ബേസിക് സ്കൂളിലേക്ക് ഒരു വിദ്യാര്‍ഥിയെ പറഞ്ഞയക്കണമെന്ന അത്യാഗ്രഹവും!

എല്ലാം ശരിയാവുമായിരിക്കുമല്ലേ?

മെയ്‌ 14, 2017

2016 ഫെബ്രുവരി 20, ശനിയാഴ്‌ച

കണ്ണികള്‍ പൊട്ടിക്കപ്പെടാനുള്ളതാണ്



ജീവിതത്തിന്‍റെ മധുരസംവല്‍സരങ്ങള്‍ മുഴുവനും തമ്പ്രാക്കള്‍ക്ക്‌ വേണ്ടി പണയപ്പെടുത്തിയവരേ...

ജന്മം കൊണ്ടു മാത്രം തമ്പ്രാക്കണ്ണിയില്‍ ഇഴചേര്‍ത്തതായി മുദ്രചാര്‍ത്തപ്പെട്ടതിന്‍റെ നൊമ്പരത്തോടെ, തലകുനിച്ചുള്ള അഭിവാദ്യങ്ങള്‍.  

'അടിമപ്പെടുത്താന്‍ തീവ്രമായി ആഗ്രഹിക്കുന്നവരോ, അടിപ്പെടാന്‍ ജന്മം കൊണ്ട് മാത്രം നിയുക്തരായവരോ, ആരാണ് ആദ്യം മാറേണ്ടത്'? എന്ന ചോദ്യം ഇപ്പോഴും നിലനില്‍ക്കുന്നു. ഒപ്പം നിന്ന് മാറേണ്ടതിന്‍റെ, വികസിക്കേണ്ടതിന്‍റെ  ആവശ്യകത മനസ്സിലാക്കാന്‍ പറ്റാത്ത വിധം അന്തരീക്ഷം സംഘര്‍ഷഭരിതവുമായിരിക്കുന്നു. 

ചില കണ്ണികള്‍ പൊട്ടിക്കപ്പെടാനുള്ളതാണ്, അവ പൊട്ടുക തന്നെ ചെയ്യും. 


ഫെബ്രുവരി 20, 2016

2015 നവംബർ 16, തിങ്കളാഴ്‌ച

ഒരു കൊച്ചു ബോധോദയത്തിന്‍റെ അന്ത്യം

ഇതൊരുപാട് നാള്‍ മുമ്പെഴുതിയതാണ്, പബ്ലിഷണോ, വേണ്ടയോ? എന്ന്‍ ചിന്തിച്ച് ഡ്രാഫ്റ്റില്‍ കിടത്തിയതാണ്. ഇപ്പോള്‍ തോന്നുന്നു, ചില രാഷ്ട്രീയങ്ങള്‍ പറഞ്ഞേ തീരൂ, ചിലവ എഴുതിയും. നിന്ന നില്‍പ്പില്‍ തട്ടിപ്പോയാല്‍ പിന്നെ ഡ്രാഫ്റ്റ്‌ ആര് വായിക്കും? ചിന്തകള്‍ ആര് മനസ്സിലാക്കും?

(അമ്പോ എന്തൊരഹങ്കാരം, ഇതു കേട്ടാല്‍ തോന്നും ഈ പബ്ലിഷുന്ന പേജ് വായിക്കാന്‍ ആള്‍ക്കാര്‍ വരി നില്‍ക്കുകയാണെന്ന് ! സ്റ്റാറ്റിസ്റ്റിക്സില്‍ കാണിക്കുന്ന വായനാസൂചികള്‍ മുഴ്മന്‍ ഞാന്‍ തന്നെ വീണ്ടും വീണ്ടും വായിച്ചാസ്വദിച്ചതിന്‍റെയാണെന്ന് തോന്നുന്നു).

എന്നിരുന്നാലും, 2013 ആഗസ്റ്റ്‌ 22 ന്‍റെ 'ഭൂമിയുടെ സന്തതി' എന്ന പോസ്റ്റിനും 24 ന്‍റെ 'റാഗിങ്ങ്' എന്ന പോസ്റ്റിനും ഇടയില്‍ ഇതു വായിക്കാനപേക്ഷ.

പയ്യന്‍സിനു പേരിടുന്ന 'അവകാശ'ത്തര്‍ക്കത്തില്‍ അവന്‍റെ അച്ഛന് രണ്ടു അഭിപ്രായങ്ങള്‍ ഉണ്ടായിരുന്നു. ഏതെങ്കിലുമൊരു മതത്തിന്‍റെയോ ജാതിയുടെയോ ചുവയുള്ള ഒരു പേരായിരിക്കരുത് എന്നതാണ് ഒന്ന്. മറ്റൊന്നാകട്ടെ, അധമവര്‍ഗ്ഗങ്ങള്‍ എന്ന് ചിലര്‍ കരുതിപ്പോരുന്ന, ജാതിയില്‍ വളരെ താഴ്ന്നവര്‍ക്ക് അപ്രാപ്യങ്ങളായ elegant ആയ elite class പേര് ആവരുത് എന്നതും. ഇനി ഒരുവേള മതത്തിന്‍റെ ചുവ വേണമെന്നു തന്നെയിരിക്കട്ടെ, മാതാപിതാക്കളുടെ മതം എന്ന് 'വിവക്ഷിക്കപ്പെടുന്ന' മതത്തിന്‍റെ കുത്തകാവകാശം പേറുന്ന പേരുകള്‍ ഒഴികെ ഏതും സ്വീകാര്യമായിരുന്നു. അത്രയധികം വെറുക്കുന്നു അയാള്‍, ജാതി-മത പേക്കൂത്തുകളെ. പക്ഷെ കുടുംബക്കാരോട് ഈ പേരില്‍ തര്‍ക്കിച്ച് തന്നിലെ ഊര്‍ജ്ജം ഒഴുക്കിക്കളയാനും അയാളില്ല.ഒരു കാര്യം കൂടി വ്യക്തമാക്കിയിരുന്നു, ഇനിഷ്യലായി അമ്മയുടെ പേര് ആയിരിക്കും.

താളം തെറ്റി ദിശാബോധമില്ലാതെ പായുന്ന ഒരു ഘോഷയാത്രയില്‍ പങ്കാളിയാകാതെ നടക്കാന്‍ അയാള്‍ക്കുമില്ലേ ആഗ്രഹം? "താന്‍ പിടിക്കുന്ന മുയലിനു കൊമ്പ് നാല്" എന്ന വാശി അയാള്‍ക്കില്ല, മറിച്ച് താന്‍ സഞ്ചരിക്കുന്ന വഴി ശരിയാണെന്നും ഇതിലൂടെയാണ് യുക്തിബോധമുള്ള ഒരു സമൂഹം സഞ്ചരിക്കേണ്ടത് എന്നുമാണ് അയാള്‍ വിശ്വസിക്കുന്നത്.

അയാളുടെ അഭിപ്രായങ്ങളെ പാടെ നിരാകരിച്ച് പയ്യന്‍സിന് ഒരു elite class പേര് തെരെഞ്ഞെടുക്കുന്നതിലേക്ക് കാര്യങ്ങള്‍ എത്തിയ സ്ഥിതിക്ക് താന്‍ കണ്ടു വച്ച പേര് തന്‍റെ ബ്ലോഗിന് കൊടുത്ത് സായൂജ്യം നേടാന്‍ അയാള്‍ തീരുമാനിച്ചു. ബ്ലോഗിന്‍റെ പേര് മാറ്റുന്ന കാര്യം നേരത്തെ തന്നെ ഒരു 'കൊച്ചു ബോധോദയത്തില്‍'  തീരുമാനിക്കപ്പെട്ടിരുന്നുവല്ലോ. കുട്ടി ഇപ്പോഴുള്ള വിളിപ്പേരില്‍ തുടരട്ടെ, അല്ലെങ്കിലും ഒരു പേരിലെന്തിരിക്കുന്നു?

(ആഗസ്റ്റ്‌, 2013)


2015 നവംബർ 9, തിങ്കളാഴ്‌ച

സസ്യം


വായിലേക്ക് വീഴുന്നത് സസ്യവും സഭ്യവുമാവണമെന്നു നിര്‍ബന്ധം, എന്നാല്‍ വായില്‍ നിന്നുംവീഴുന്നതോ? അസസ്യവും അസഭ്യവും.
പോയി പണി നോക്ക്!

(വിദൂര) കടപ്പാട് മത്തായി 15:11